Ağsaqqallar Şurası tərəfindən təşkil olunan tədbirdə Şuranın sədr müavini Bayram Yusifov, ADAU-nun rektoru Zəfər Qurbanov, Gəncə Şəhər İcra Hakimiyyəti başçısı Aparatının Şəhərin mədəni irsinin qorunması şöbəsinin müdiri Yadigar Bədəlov, Türkiyənin Gəncədəki Baş Konsulluğunun vitse-konsulu Yiğit Yalın Soyal, Gəncə Şəhər Ağsaqqallar Şurasının sədri, professor Nurəddin Məmmədov, Qərb bölgəsinin ağsaqqalları, ziyalılar, şəhid ailələri, müharibə iştirakçıları və tələbələr iştirak ediblər.

Azərbaycan Dövlət Aqrar Universitetində keçirilən tədbir Dövlət Himninin səsləndirilməsi və şəhidlərin xatirəsinin bir dəqiqəlik sükutla yad edilməsi ilə başlanıb. Rektor Zəfər Qurbanov çıxışında 2025-ci ilin “Konstitusiya və Suverenlik İli” elan edilməsinin əhəmiyyətindən danışaraq, müstəqilliyin qorunması və gənclərlə ağsaqqalların vəhdətinin önəmini vurğulayıb.

Regional konfransda çıxış edən natiqlər – Yadigar Bədəlov, Yiğit Yalın Soyal, Nurəddin Məmmədov, Mehman Rzayev, Bilal Məmmədov, Cavanşir Qocayev, Eyvaz Hüseynov və digərləri Azərbaycanın müstəqillik yolundan, Ulu Öndər Heydər Əliyevin və Prezident İlham Əliyevin bu istiqamətdə gördüyü işlərdən bəhs ediblər.

Tədbirdə GDU-nun professoru, tarix elmləri doktoru Həsənbala Sadıqovun “Prezident İlham Əliyev – müstəqilliyimizin və suverenliyimizin təminatçısıdır” mövzusunda məruzəsi dinlənilib.

Bayram Yusifov çıxışında müstəqil Azərbaycanın əldə etdiyi nailiyyətlərdən danışıb, Prezident İlham Əliyevin rəhbərliyi ilə ölkənin regionda və dünyada güclü dövlətə çevrildiyini vurğulayıb.

Konfrans çərçivəsində Gəncə Şəhər Ağsaqqallar Şurasının sədri, professor Nurəddin Məmmədov Azərbaycan Ağsaqqallar Şurasının “Fəxri Ağsaqqal” döş nişanı ilə təltif olunub. Həmçinin Zabit Xəlilov və Cəmaləddin Rzayev fəxri fərmanlarla mükafatlandırılıblar.

Tədbir iştirakçıları sonda Gəncə Memorial Kompleksini ziyarət edərək şəhidlərin xatirəsinə ehtiramlarını bildiriblər.

Daha sonra Fövqəladə Hallar Nazirliyinin Mülki Müdafiə Qoşunlarının Xilasetmə briqadasının (N saylı hərbi hissə) təşkilatçılığı, Gəncə Şəhər İcra Hakimiyyətinin, Gəncə Şəhər Ağsaqqallar Şurasının və Gəncə şəhər Mərkəzi Kitabxanasının dəstəyi ilə “Dövlət Müstəqilliyimiz – əbədidir” mövzusunda maarifləndirici tədbir keçirilib.