Fikrət Əmirov adına Gəncə Dövlət Filarmoniyasının önündə 9 Noyabr – Dövlət Bayrağı Günü münasibətilə konsert proqramı təşkil olunub. Tədbirdə Gəncə Şəhər İcra Hakimiyyətinin başçısı Niyazi Bayramov, Gürcüstanın Gəncədəki Baş konsulu Kaxaber Abdaladze, Türkiyənin Gəncədəki vitse-konsulu Yiğit Yalın Soyel, Milli Məclisin deputatı Müşfiq Cəfərov, YAP Gəncə şəhər təşkilatının sədri Bayram Aslanov, Gəncə Şəhər İcra Hakimiyyəti başçısının Aparatının əməkdaşları, hüquq-mühafizə orqanlarının rəhbərləri və digər rəsmilər iştirak ediblər.

9 Noyabr – Dövlət Bayrağı Günü münasibətilə təşkil olunan tədbir hərbi orkestrin ifasında Azərbaycan Respublikasının Dövlət Himninin səsləndirilməsi ilə açıq elan olunub.

Bildirilib ki, 9 Noyabr hər bir azərbaycanlının qürur və iftixar duyduğu, milli birliyimizin, dövlət müstəqilliyimizin və azadlığımızın rəmzi olan üçrəngli bayrağımızın günüdür. Bu gün şanlı üçrəngli bayrağımız Azərbaycanın hər guşəsində, o cümlədən Şuşada, Laçında, Xocalıda, Xankəndidə qürurla dalğalanır. Bu bayraq Vətənimizin azadlığı uğrunda canını fəda etmiş şəhidlərimizin müqəddəs qanı bahasına ucalıb! Bayraq xalqın kimliyidir, qürurudur, tarixidir!

Rəsmi hissədən sonra Gəncə Dövlət Milli Dram Teatrının aktyorlarının, Gəncə şəhər 4 nömrəli musiqi məktəbinin xor kollektivinin, Uşaq İncəsənət Məktəbinin “Xəmsə” nağaraçılar ansamblının, yeniyetmə ifaçı Rövşən Nəsirovun və “Xəmsə” Uşaq Rəqs Ansamblının çıxışları izlənilib.