Gəncə Şəhər İcra Hakimiyyətinin və Azərbaycan Dövlət Aqrar Universitetinin (ADAU) birgə təşkilatçılığı ilə “Gender əsaslı zorakılığa qarşı 16 günlük fəallıq” kampaniyası çərçivəsində növbəti tədbir baş tutub.

Konfransda Gəncə Şəhər İcra Hakimiyyəti yanında “Məişət zorakılığının qarşısının alınması sahəsində monitorinq və əlaqələndirmə qrupunun üzvü” Xalidə Mete, ADAU-nun Tərbiyə işləri üzrə prorektoru Aidə Qasımova, Gəncə Şəhər Baş Polis İdarəsinin İctimai Təhlükəsizlik idarəsinin profilaktika şöbəsinin inspektoru, polis baş leytenantı Yusif Yusifov, Kəpəz bələdiyyəsinin Gender komissiyasının sədri Günay Filmanova, 29 nömrəli tam orta məktəbin psixoloqu Fatimə Yusifova, Gəncə Şəhər İcra Hakimiyyəti başçısı Aparatının əməkdaşları və universitetin müəllim heyəti iştirak ediblər.

Tədbirdə qeyd edilib ki, “Gender əsaslı zorakılığa qarşı 16 günlük fəallıq” kampaniyası hər il 25 noyabr – Qadınlara qarşı Zorakılıqla Beynəlxalq Mübarizə Günündən başlayaraq 10 dekabr – Beynəlxalq İnsan Hüquqları Gününədək davam edir. Bu müddət ərzində müxtəlif formatlarda tədbirlər təşkil olunur və dünya ictimaiyyətinə qadınlara və qızlara qarşı zorakılığın qarşısının alınması ilə bağlı çağırışlar edilir.

Daha sonra “Ailədaxili münaqişələr və məişət zorakılığı ilə bağlı Gəncə Şəhər İcra Hakimiyyətinə daxil olan müraciətlər və onların həlli istiqamətində görülən tədbirlər. Ailə dəyərləri. Fərqli yanaşmalar”, “Risk qrupuna daxil olan uşaqlar və onların ailələri ilə bağlı aparılan işlər”, “Hüquq mühafizə orqanlarında qeydiyyatda olan münaqişəli ailələrlə bağlı həyata keçirilən tədbirlər” və digər mövzularda çıxışlar dinlənilib.

Konfransda iştirakçıların sualları cavablandırılıb.

Qeyd edək ki, tədbir münaqişəli ailələr üçün nəzərdə tutulub.